Mbwire gito canje...

Ejo bundi naganiriye n’umumenyeshamakuru Masengo wo kuri Radiyo Bonesha FM. Yari yantumiye mu kiganiro ciwe ashaka kumenya ingene abatumire biwe babona ivyavuye muri ya nama iheruka kubera mu Kigobe mju mpera z’umwaka waraye utashe. Nari kumwe n’umukuru wa Uprona hamwe n’umunyamabanga mukuru wa Frodebu.

Jewe nashimye kumubwira nti : ico nipfuza cane cane, kwari ukugerageza kwumviriza bose, nkongera ngasoma ivyo bandika, ariko cane cane nkihatira kuvundurura ivyo barya na bariya bahisha. Narashinze intahe mvuga ko ica mbere canejereje ar’uko abo vyega bose bari bitavye inama, ushizemwo nabari bafise amakenga.

Sinahishije ko nashimye uburyo Umukuru w’Inama Nshingamateka yashikirije ijhambo rihumuriza mu kwugurura inama. Kandi n’abandi ni ko babibonye.

 

Narongeye ndakenguruka bimwe biboneka akigoro abo muri ADC-Ikibiri bagize. Nta watukanye n’uwundi ; nta n’uwivumbuye. Abari mu nama bariyemereye ko hariho ivyo bumvikanye, nk’ivyerekeye ibijanye n’ugusubiramwo guharira ibijanye n’amasezerano y’i Arusha.

Baragiriye ko baremanga ko hariho ivyo batashoboye guhurirako kandi ntivyari bike. Basezeranye ko bakwiye kuzobigaruka ko mu bihe biri imbere. Kukaba nkako, umwanya wari muto, ureste ko n’imitwe yari igize imisi myinshi ishushe.

 

Jewe narongeye ndanezerwa n’uko vyagaragaye ko Abarundi bafise uburyo n’ububasha vy’ugutunganya ibiganiro bibahuza batarinze kuzera inze. Narabonye kandi ko dushobora guhera uno musi tuganira mu Kirundi, mu rurimi rwa ba Sokuru, ari rwo rutuma na bene wacu ba nyarucari bo ku mitumba ya rugur bakurikirana ibivugwa.

Ndasavye tukenguruke ivyo tumaze gushika ko. Ibindi ni hanyuma !

Ariko rero twumvikane : amakuru yakurikiye n’ingene abanyamigambwe babandanije baterana amajambo ntituvyirengagize. Uvyihweje, bamwe bamwe barindiriye igihe Inama Nshingamateka izotora rirya tegeko ngenderwako ritunganya ivy’amatora bace basubira muri yegereyegere mu gihe vyova mwo impari zidahumuriza. Hariho abatari bake, harimwo n’abanyamahanga bahaye babinuganugana.
Ubiravye rero, iyitavyaye inyana izovyara ishuri. N’abakera barayamaze bavuga bati : ingeso iraraba ntihwera. Turamenyereye kubona benewacu bayaga amasigaracicaro  bivugira bati : ampisha ko anyanka nanje nkamuhisha ko ndabizi.

Ng’iyo ingendo yishe Uburundi bwa Nyabururunga. Ikindi cishe igihugu, n’ukuguma twidoga aho gutanga ikivi umwe wese ashobora kuduza. Hargeze ko tuvugana ukuri kujanye n’inzitizi zitwugarije.
Ni co gituma ngomba guhamagarira uwo wese abishobora afashe mu gutangiriza. Ni co gituma mvuze nti : MBWIRE GITO CANJE… GITO C’UWUNDI YUMVIREHO.


CIRID : Imigambi irabandanya

Kubera amabanga niyemeje mu gushinga ishirahamwe mpuzamakungu rifise n’ishami mu Burundi kandi rifise intumbero y’uguhuza abandi CIRID (www.cirid.ch), ndatumiye uwo wese abishaka kandi abishoboye azoze mu biganiro iryo shirahamwe ryipfuza kugirana n’uwo wese afise iciyumviro cubaka. Ukeneye kumenya ibisumba ivyanditse ngaha, dutere akamo kuri :

Tel. (+257) 78 834 090 (Bujumbura) canke (+41) 79 534 3711 ; burundi@cirid.ch, canke geneve@cirid.ch.

Ivyo dukora bimwe bimwe biri muri raporo ushobora gusoma ufyonze ng’aha :  

http://www.cirid.info/#!chronique-du-mois/c1uqa)